ಜ್ಯೋತಿಷಿ ಸುಸ್ತೂ!

ಜ್ಯೋತಿಶ್ಯಾಲಯ, ನಿಮ್ಮ ಭವಿಷ್ಯವನ್ನು ನಿಖರವಾಗಿ ತಿಳಿಯಲು ಒಮ್ಮೆ ಭೇಟಿ ಕೊಡಿ, ಬೋರ್ಡನ್ನು ಓದಿದ ಮಹಿಳೆಯೊಬ್ಬರು, ಅತ್ತಿತ್ತ ತಿರುಗಿ ಯಾರು ಗಮನಿಸುತ್ತಿಲ್ಲವೆಂದು ಖಚಿತ ಪಡಿಸಿಕೊಂಡು, ಒಳಗೆ ಬಂದರು. ಖಾಲಿಯಿದ್ದ ಕುರ್ಚಿಯೊಂದರಲ್ಲಿ ಮುದುಡಿ ಕುಳಿತರು. ಗಿರಾಕಿ ಬಂದ ಸುಳಿವನ್ನು ಪಡೆದ ಜ್ಯೋತಿಷಿ, ಬಾಗಿಲಿಗೆ ಹಾಕಿದ ಪರದೆ ಸರಿಸಿ, ಮುಖ ಹೊರಗೆ ಹಾಕಿ, “ಒಳಗೆ ಬನ್ನಿ” ಎಂಬ ಆಹ್ವಾನವಿತ್ತರು.

ಹೆಂಗಸು ಸಂಕೋಚದಿಂದ, ತಲೆಯ ಮೇಲಿನ ಸೆರಗನ್ನು ಸರಿ ಪಡಿಸಿಕೊಂಡು, ಒಳಹೋದರು. ತಮ್ಮ ಜಾತಕವನ್ನು ಜ್ಯೋತಿಷಿ ಕೈಗಿತ್ತು, ತಲೆ ತಗ್ಗಿಸಿ ಯಾವುದೋ ಯೋಚನೆಯಲ್ಲಿ ಮಗ್ನರಾದರು. ಜಾತಕವನ್ನು ತುಂಬಾ ಹೊತ್ತು ಪರಿಶೀಲಿಸಿ ನಂತರ, ಜ್ಯೋತಿಷಿ ಭಾರವಾದ ಧನಿಯಲ್ಲಿ ಹೇಳಿದರು, “ಅಮ್ಮಾ, ಕೆಟ್ಟ ಸುದ್ದಿಯೊಂದಿದೆ, ಇನ್ನು ಕೆಲವೇ ತಿಂಗಳುಗಳಲ್ಲಿ ನಿಮ್ಮ ಗಂಡ ಧಾರುಣವಾದ ಸಾವನ್ನಪ್ಪಲಿದ್ದಾರೆ”

ಜ್ಯೋತಿಷಿ ಮಾತಿನಿಂದ ಆಘಾತಕ್ಕೆ ಒಳಗಾದ ಹೆಂಗಸು, ನಿಧಾನವಾಗಿ ಚೇತರಿಸಿಕೊಂಡು, ನಿಡಿದಾದ ಉಸಿರನ್ನು ಒಳತೆಗೆದುಕೊಂಡು, ಧ್ವನಿ ಸರಿಮಾಡಿಕೊಂಡು, ಖಚಿತವಾದ ಧ್ವನಿಯಲ್ಲಿ ಕೇಳಿದರು, “ನಾನು ಕೊಲೆಯ ಅಪರಾಧದಿಂದ ಮುಕ್ತಳಾಗುವೆನಾ?”

ಆಕೆಯ ಮಾತು ಕೇಳಿ ಜ್ಯೋತಿಷಿ ಸುಸ್ತೂ! ಇನ್ನೇನು ಮೂರ್ಚೆ ಹೋಗುವುದೊಂದು ಬಾಕಿ!